Аҕа дойду көмүскээччилэрин күнүгэр биһиги оскуолабыт иһигэр «Снежный барс» байыаннай-патриотическай күрэхтэһии буолан ааста. Тэрээһин саҕаланыытыгар оскуола 2015 сыллааҕы выпускнига, армияттан кэлбит Иннокентий Михайлов армия олоҕун-дьаһаҕын туһунан оҕолорго сырдатта. Ол кэннэ оҕолор икки хамаандаҕа арахсан, 7 түһүмэхтээх күрэхтэрин саҕалаатылар. Бастакы хамаанда «Эрчим», иккис хамаанда «Патриот» диэн ааттаннылар. Түһүмэхтэрин туһунан кэпсиир эбит буоллахха: бэйэни билиһиннэрии, байыаннай хаамыы; сааны ыһааһын, ырытыы; тардыныы, пресс хачайдааһына; саанан ытыы; мэһэйдэрдээх эстафета; киһи туругун билиини көрдөрөр ыйытынньык; канат тардыһыыта. Икки хамаандалар олус күүстээх киирсиилэрин кэннэ кыайыылааҕынан «Патриот» хамаанда таҕыста. Саргылаана Ушницкая уонна Егор Гаврильев «Меткий стрелок» анал аат хаһаайына буоллулар. Ону тэҥэ, Виктория Старостина уонна Вадим Слепцов «Разборка, сборка АК» албан аат үрдүк аатын ылан үөрүү-көтүү аргыстаннылар. Хамаандалар, оҕолор грамотанан, кубогынан наҕараадаланнылар. Өссө даҕаны маннык күрэхтэһии буоларын баҕарабыт.

Слепцова Надя, 10 кылаас үөрэнээччитэ