Хас биирдии киһи устудьуоннуу сылдьан практиканы ааһар кэмэ умнуллубат буолааччы. Быйыл биһиги оскуолабытыгар икки практикант кэлэн үлэлээн-хамсаан, оҕолору элбэххэ үөрэтэн, бэйэлэрин уопуттарын атастаһан бардылар. Олортон биирдэстэрэ – Слепцова Күннэй Маевна.

- Үтүө күнүнэн, Күннэй Маевна! Бу үөрэммит оскуолаҕар кэлэн кыракый кэмҥэ практиланан баран эрэҕин. Онон си-бээстээн биһиги эйигин кытта кэпсэтэ түһүөхпүтүн баҕарабыт. Аҕыйах ыйытыыга, баhаалыста, эппиэттээ.

- Үтүө күнүнэн! Боппуруоска эппиэттииргэ бэлэммин.

-Хас сыллаахха оскуолаҕын бүтэрбиккиний? Ханнык үөрэххэ үөрэнэ сылдьаҕын?

- Мин Сартаҥ орто оскуолатын 2014 сыллаахха бүтэрбитим. Оскуолабын бүтэрэн баран, Бүлүүтээҕи педколледжка эбии үөрэхтээһин салаатыгар туттарсан киирбитим.

- Бу үөрэх туһунан кыратык үөрэнээччилэргэ анаан кэпсии түс. 9-с кэннэ ханнык салааҕа туттарсан киириэххэ сөбүй? Уонна бэйэн бу үҥкүүгэ уһуйааччы үөрэҕэр оҕо эрдэххиттэн киириэххин баҕарар этин дуо?

- Бүлүү педколледжыгар, уопсайа, 7 салаанан үөрэх баар. 9-с кылаас кэннэ ОПИ, ол эбэтэр информатика уонна ДО (эбии үѳрэхтээḣин) диэн үөрэхтэр бааллар. Бэйэм туһунан этэр эбит буоллахха, үҥкүүлүүрбүн оҕо эрдэхпиттэн сөбүлүүр этим. Оскуолаҕа үөрэнэр кэмнэрбэр араас тэрээһиннэргэ барытыгар кыттан, үҥкүүлээн иһэрим. Ол да иḣин буолуо, улаатан баран, бу үҥкүү үөрэҕин талбытым.

- Аан маҥнай үөрэнэ тиийэн баран туох ыарахаттары көрсүбүккүнүй?

- Үөрэхпэр бастаан элбэх ыарахаттары көрсүбүтүм. Чиэһинэ эттэххэ, олох сөбүлээбэ-тэҕим. Оҕолору кытта билсэрбэр да, үөрэхпэр да олус элбэх ыарахаттар бааллар этэ. Үксүн үҥкүүм өттүгэр ыарахаттар элбэхтэрэ. Холобура, хаһан даҕаны станокка турбатах киһи быһыытынан олус ыарырҕатар этим. Классическай үҥкүүгэ хайдах ааттаах хамсаныылар баалларын, хайдах оҥоһуллалларын билбэт этим. Миигин кытта эрдэ музыкальнай оскуоланы бүтэрбит кыргыттар киирбиттэрэ, кинилэр барытын билэр сатыыр этилэр. Мин кинилэртэн көрөн, бэйэм үөрэнэн оҥорор буолбутум. Онтон сыыйа ансаамбылга киирэн, элбэх оҕолордуун доҕордоһон бу үөрэхпин олус сөбүлээтим.

- Практикан хайдах ааспытын туһунан кылгастык кэпсии тус.

- Практикам бириэмэтэ кылгас соҕус эбит дии санаатым. Ол да буоллар, бу бириэмэбин сөпкө туһанан, элбэх үлэни онорон практикабыттан астынным. Практикабар оскуола оҕолорун икки бөлөххө арааран дьарыктаатым. Ол түмүгэр элбэҕи биллим, уопутурдум дии саныыбын.

- Түмүккэ үөрэнээччилэргэ баҕа санааҥ?

-Үөрэнээччилэргэ үөрэҕи-дьарыгы бииргэ дьүөрэлээн оскуолатааҕы кэмнэргитин умнуллубаттык атаарын диэн баҕарыам этэ. Үөрэххитигэр кыһаллын, элбэҕи билэ-көрө сатаан.

Хаһыаппыт нөҥүө Күннэй Маевнаҕа өссө да үрдүккэ дабайыылары, үгүс ситиһиилэри баҕарабыт! Биһиэхэ, үөрэнээччилэргэ, умнуллубат кэрэ кэмнэри бэлэхтээбиккэр, үөрэппиккэр-такайбыккар уонна ыйытыыларбытыгар эппиэттээбиккэр махтанабыт!

Ушницкий Афоня уонна Слепцова Надя, 10 кылаас үөрэнээччилэрэ