  
  
Муус устар 19 күнүгэр Боруулаах нэһилиэгэр оҕону оскуола эрдэхтэн үлэҕэ үөрэтэр сыаллаах-соруктаах «Сатабыл» фестиваль ыытылынна. Фестивалы Боруулаах агро-оскуолата уонна оройуоннааҕы оҕо киинэ тэрийэн ыыттылар. «Сатабыл» фестиваль чэрчитинэн оҕолор, уопсайа, сэттэ араас күрэххэ күөн көрүстүлэр: «Булчут сатабыла», бу күрэххэ 11-14 диэри саастаах уолаттар ытыыга, хайыһарынан сүүрүүгэ, мас хайытыытыгар сатабылларын көрдөрдүлэр; «Эдэр сылгыһыт», манна 14-18 диэри саастаах уолаттар ат тэрилигэр, көлүйүүгэ, салайыыга билиилэрин көрдөрдүлэр; «Иистэнньэӊ» күрэххэ 14-18 диэри саастаах кыргыттар үтүлүк тиктилэр; «Төрүт иис», күрэххэ 11-14 диэри саастаах кыргыттар төрүт иис кистэлэӊин билиилэрин, харысхал тигиитин көрдөрдүлэр; «Мультимедийная журналистика», манна 14-18 диэри саастаах оҕолор бэйэ санаатын сатаан этиитигэр, дьоӊӊо тиэрдиигэ талааннарын көрдөрдүлэр; «Асчыт» күрэххэ 11-14 диэри саастаах кыргыттар ас астааһыныгар холоннулар; «Трактороведение», бу күрэххэ 14-18 диэри саастаах уолаттар тыраахтары ыыттылар, суол быраабылатыгар билиилэрин тургуттулар.
Фестивальга Арыылаах, Боруулаах, Боронук, Сартаҥ оскуолатын үөрэнээччилэрэ уонна оройуоннааҕы оҕо киинин иитиллээччилэрэ кыттыыны ыллылар. Бу фестивальга 6 оҕо баран ситиһиилээхтик кыттан, биһиги оскуолабыт чиэһин көмүскээн кэллэ. Ол курдук, «Булчут сатабылыгар» Енохов Сергей, «Эдэр сылгыһыт» Ушницкий Тимур, «Мультимедийная журналистика» күрэххэ Слепцова Надя 1 миэстэни ыллылар. «Асчыт» күрэххэ Аммосова Нарьяна, «Иистэнньэӊ» күрэххэ Слепцова Айталина 3 миэстэҕэ таҕыстылар. «Төрүт иис» күрэххэ Новикова Айыллаана кытынна. Ону таһынан, оҕолору салайан илдьэ сылдьыбыт үлэ уруогун учууталлара Ефимов Анатолий Темплаториевич, Колесова Екатерина Семеновна хайҕал грамотанан наҕараадаланнылар.
Мин санаабар, маннык хабааннаах тэрээһиннэр ыытыллаллара олус хайҕаллаах. Оҕо сайдарыгар, сатабылы ыларыгар бэйэтэ этинэн-хаанынан сыһыннаҕына, тутан-хабан көрдөҕүнэ улахан көмөнү ылар, интириэһэ өссө күүһүрэр. «Сатабыл» фестивалыгар сыл-дьан биһиги элбэххэ үөрэннэбит, биллибит, көрдүбүт, сатабылбытын сайыннардыбыт.
|