Айылҕа уонна киһи… Бу быстыспат ситимнээх өйдөбүллэр. Айылҕа, уу, күөх үүнээйи, ыраас салгын киһи олоҕор олус улахан суолталаах. Онон, айылҕаҕа харыстабыллаахтык сыһыаннаһыы – хас биирдии киһи эбээһинэһэ буолар. Киһи-аймах айылҕа курдук барҕа баайын, олорор дьиэтин харыстыы, ытыктыы сылдьыахтаах.

Онтон сиэттэрэн, биһиги дойдубутугар быйыл «Экология сыла» биллэриллибитэ. Сартаҥ орто оскуолатын халыҥ хамаандата онтон туора турбакка, тулалыыр эйгэбитигэр улахан болҕомтотун уурда. Ол курдук, биир үтүө күн бука бары «Мы за чистое село» диэн күүстээх акция-субуотунньукка таҕыстылар. Бу тэрээһин үүнэр көлүөнэҕэ өбүгэ саҕаттан салаллан кэлбит айылҕаҕа уонна төрөөбүт дойдуга ытыктабыллаах сыһыаҥҥа иитэр сыаллаах-соруктаах ыытылынна. Тэрээһиҥҥэ барыта 140 киһи кыттыыны ылла. Ол иһигэр үөрэнээччилэр, төрөппүттэр уонна оскуола бары үлэһиттэрэ. Сартаҥ үрэх үрдүн, ыһыахтыыр сири уонна оҕолор оонньуур кырдалларын бөҕүн ыраастаатылар. Күүстээх хамсаныы кэнниттэн барыта икки прицеп бөх тиэйилиннэ.

Маны таһынан, акция чэрчитинэн «Мы за охрану природы» диэн кылаастар икки ардыларынааҕы плакаттар күрэхтэрэ ыытылынна. Плакаттары үөрэнээччилэр ардахтан-хаартан, тыалтан-куустан харыстыыр гына кырааскалаан уонна айылҕаны харыстыырга ыҥырар ис хоһоонноох гына кыһаллан-мүһэллэн туран, дууһаларын ууран оҥорбуттара наһаа кэрэхсэбиллээх. Үлэлэр кырдал үрдүнэн ойуурга киириигэ, үрэх кытыытыгар ыйаннылар.

Аныгы сайдыылаах эдэр ыччат төрөөбүт дойдутугар, тулалыыр эйгэтигэр ытыктабыллаахтык сыһыаннаһыахтааҕын кыра сааһыттан билиэхтээх, өйүгэр-санаатыгар иҥэриниэхтээх, туох барыта айылҕаттан кэлэрин өйдүөхтээх, айылҕа – киһи иккис дьиэтэ буоларын умнуо суохтаах. Онон, Сартаҥ дьоно биир күн үтүө суобастаахтык үлэлээн, сибиэһэй салгыҥҥа сылдьан астынан-дуоһуйан дьиэлэригэр үөрэ-көтө тарҕастылар.

Осипова Л.С., саха тылын уонна литературатын учуутала