Статистика
Онлайн всего: 1 Гостей: 1 Пользователей: 0
|
Главная » 2018 » Март » 8 » «Эрэл» түмсүү эрэллээх эр дьонноро
14:11 «Эрэл» түмсүү эрэллээх эр дьонноро |
Эр киһи оруола уол оҕону иитиигэ олус улахан суолталаах буолар. Улаатан эрэр уол оҕо эр киһини кытары элбэхтик алтыһыахтаах, үлэҕэ-хамнаска эриллэн-буруллан иитиллэн тахсыахтаах. Оччоҕуна эрэ, олох бары араас түгэннэригэр бэлэм, ыраас суобастаах, күүстээх санаалаах, бигэ тирэхтээх, киһилии киһи иитиллэн тахсар.
Оннук санаанан, быйылгы үөрэх дьылыгар алтынньы 17 күнүгэр оскуолабыт коллективын эр дьоно Владимир Владимирович Слепцов салалтатынан "Эрэл" түмсүү тэрийдилэр. Түмсүү сүрүн сыала – дьиҥнээх саха эр киһитин иитэн таһаарыы.
"Эрэл" түмсүү оҕолорго холобур буолан, бэйэтин үлэтин номнуо саҕалаата. Ол курдук, түмсүү алтынньыга 6 бэтэрээни мууһунан хааччыйбыта. Онно оҕолору кытта бииргэ оскуола эр дьоно хас да күннээх субуотунньукка баран, күүстээх үлэни ыыппыттара кэрэхсэбиллээх этэ.
Сэтинньигэ "Эрэл" түмсүү көҕүлээһининэн, оскуола иһинээҕи хапсаҕай аһаҕас күрэҕин тэрийбитэ. Онно, уопсайа, 32 оҕо кыттан, 2 оҕо чемпион үрдүк аатын сүгэн дьон биһирэбилин ылбыттара, кыайыы-хотуу өрөгөйүн билбиттэрэ. Хапсаҕайга тренеринэн "Эрэл" түмсүү эдэр чилиэнэ, физкультура учуутала Алексей Иннокентьевич Слепцов үлэлээбитэ уонна иилээн-саҕалаан тэрийбитэ хайҕаллаах дьыала бэлиэтэнэр.
Маны таһынан, "Эрэл" түмсүү салалтатынан сэтинньигэ оҕо өйүн-санаатын сайыннарар сыаллаах, оскуолабытыгар "Чөл олох" нэдиэлэтэ буолбута. Онно оҕолор волейболга, эстафетаҕа, теннискэ, шашкаҕа, өбүгэ оонньууларыгар – хабылыкка, хаамыскаҕа күрэхтэспиттэрэ. Бу тэрээһиннэри физкультура учуутала Гаврил Семенович Слепцов олус үчүгэйдик салайан ыыппыта. Итинник хабааннаах күрэхтэһиилэр киһи этин-сиинин эрэ буолбакка, өйүн-санаатын, ыраас дууһатын, толкуйдуур толкуйун эмиэ күүскэ сайыннараллар уонна сахалыы тыыҥҥа, эйгэҕэ сыһыараллар дии саныыбыт.
Сэтинньи ыйга Сартаҥ орто оскуолатыгар "Урок охотоведения" диэн саҥа куруһуок киириитин биир бэлиэ түгэнинэн ааҕабын. Бу куруһуок уолаттары бултка, айылҕаҕа сылдьыы сиэригэр-туомугар үөрэтэр суолталаах буолар. Куруһуок салайааччытынан Алексей Иннокентьевич Слепцов үлэлиир. Манна 7-11 кылаас уолаттара сылдьаллар.
Инникитин даҕаны оскуолабыт эр дьонноро өссө даҕаны күүс-көмө буолуохтара, оскуола туһугар диэн элбэх үлэни ыытыахтара, уол оҕону иитиигэ бары күүстэрин ууран, бары үөрэнээччилэргэ холобур буолуохтара диэн эркин курдук эрэнэбит
|
|
Просмотров: 500 |
Добавил: Мари
| Рейтинг: 0.0/0 |
|
Календарь
| « Март 2018 » | | Пн | Вт | Ср | Чт | Пт | Сб | Вс | | | | | 1 | 2 | 3 | 4 | | 5 | 6 | 7 | 8 | 9 | 10 | 11 | | 12 | 13 | 14 | 15 | 16 | 17 | 18 | | 19 | 20 | 21 | 22 | 23 | 24 | 25 | | 26 | 27 | 28 | 29 | 30 | 31 |
|
| | |